ജനനവും അറിഞ്ഞില്ല ,
പ്രയാണവും അറിഞ്ഞില്ല ,
വീണു പോയൊരു
മരണവും അറിഞ്ഞില്ല എന്നെ .
ഇനിയും ഒരു ജന്മം ഉണ്ടെങ്കിൽ
ജീവിക്കണം ഞാനായി തന്നെ .
ജനിച്ച നാളിൽ തന്നെ
എന്നെ എന്നിൽ നിന്നു വേർപ്പെടുത്തി
ഞാനെന്നെ കണ്ടെത്തിയതോ -
എൻ്റെ അന്ത്യ ദിനത്തിൽ .
തിരിച്ചറിയാൻ വൈകിയതല്ല
അറിയിക്കാൻ ആരുമേ
എന്നടുക്കൽ കണ്ടില്ല .
ആരെയും എത്താനനുവദിച്ചില്ല ആരെക്കെയോ .
എന്നെ ഞാനാക്കാതിരുന്നത്
രണ്ടു വാക്കിൻ്റെ വൈരുധ്യം .
കല്ലാണ് പെണ്ണെന്നോരെഴുത്ത് .
അങ്ങനെ ഏറെ എഴുത്തുകൾ
ആരാണെഴുതിയതെന്നു പോലുമറിയാത്ത എഴുത്തുകൾ .
ഏതോ സത്യമാദ്യമേ മറച്ചു വച്ചതുകൊണ്ട്
ഞാനും കരുതി പെണ്ണ് കല്ലെന്ന് .
വിശ്വസിച്ചുപോയി ആ അസത്യം .
കല്ലിനെ പാകത്തിനൊത്തുടക്കാം
കല്ലിനെ ചേറിൽ വലിച്ചെറിയാം
കല്ലിനെ പന്തയത്തിൽ കരുവാക്കി കളിക്കാം
എന്നാൽ സത്യമോ ഞാനൊരു കല്ലല്ലെന്നതല്ലെ
കല്ലെന്ന് കബളിപ്പിച്ച് കല്ലായിരുത്തിയ
ഇത്തിരി പേരുടെ കഥ പറയാം .
കഥകളാണവരുടെ ജീവിതം .
കഥയില്ലാത്ത കനൽ പരപ്പ് .
കല്ലാക്കി പെണ്ണിനെ പട്ടിലും ചുറ്റി
അകതളത്തിലോട്ടിട്ടൊരു ലോകം .
അവൾ പുറത്തിറങ്ങിയാൽ ലോകനാശമാണ് വിധിയത്രേ
അതുകേട്ട് പേടിച്ചകത്തിരുന്നാ ജീവി .
അകത്തിരുന്നത് കല്ലിൻ്റെ വിധിയല്ലെ
ജീവനില്ലാത്ത കല്ലിൻ്റെ വിധിയല്ലെ .
ഒരു ജീവിതമൊന്നുമല്ലല്ലോ
തീരുന്നതെന്ന് സമാധാനിച്ച ഒരുകൂട്ടം മഹാന്മാർ
അവർ ജീവിച്ചത് എനിക്കൊപ്പമാണ്
ജീവിക്കുന്നത് നിങ്ങൾക്കൊപ്പവും .
ഇനി മറ്റൊരു കഥ ...
ആരോയുടച്ച് ആരുടയോ ഇഷ്ടത്തിനുടച്ച്
ചായവും പൂശീ അങ്ങാടിയിലെത്തിയൊരു
കല്ലിൻ്റെ കഥ .
കൊത്തി പാകപ്പെടുത്തിയപ്പോളെല്ലാം
കല്ലെന്നു വിശ്വസിച്ചതു കൊണ്ട്
ഒരടി നീങ്ങിയില്ലവൾ മുന്നോട്ട് .
വീണ്ടും വേദന സഹിച്ചത്
അവളുടെ മാത്രം വിധി .
കല്ലിൽ ചേല് നിനക്കെന്നോതി
ഉടഞ്ഞ് തരിയായി പൊലിഞ്ഞ
മറ്റൊരു കഥയായ ജീവനും
നിനക്കു മുന്നിലാണ് .
കല്ലൊരാളെറിഞ്ഞാലേ മുന്നോട്ടു പോകു
സ്വയം ചലിക്കാൻ കഴിയാത്ത
വിധി കല്ലിനു മാത്രം , പെണ്ണിനല്ല .
കല്ലിൻ്റെ വിധി മാറ്റാൻ കഴിയുന്ന
ശിൽപി ഉടചൊരു മേനി കൊടുക്കട്ടെ കല്ലിന് .
കല്ലിനല്ലെ പുതുമേനി വേണ്ടത്
പെണ്ണിനു വേണോ അവളെ ചലിപ്പിക്കാൻ ഒരു ശിൽപിയെ .
സത്യമിതാണ് പെണ്ണൊരു കല്ലല്ല
പെണ്ണിനെ കല്ലാക്കണ്ട
ഇനിയെങ്കിലും കല്ലുപോലൊരു
പെണ്ണീ ഉലകിൽ ഇല്ലാതിരിക്കട്ടെ .
ഞാൻ മരിക്കുന്നു കല്ലായി ജീവിച്ച്
കല്ലായല്ല മരിക്കുന്നത്
ഇനിയൊരു ജന്മമുണ്ടെങ്കിൽ
പെണ്ണായി തങ്ങണം ഈ ഉലകിൽ .
കല്ലായി ജീവിച്ച പെണ്ണിൻ്റെ കൊതിയാണത് .
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
മാറ്റത്തിനുള്ള സമയം അതിക്രമിച്ചിരിക്കുന്നു മാറേണ്ടത് മനുഷ്യരല്ല
മനുഷ്യൻ്റെ ചിന്തകളാണ്.
ഞാൻ ഈ രചനയിലൂടെ പറയാൻ ശ്രമിച്ചത് ചിന്തകളുടെ പുരോഗമനത്തിന് ഉതകട്ടെ.
-നന്ദി .
